`°¨¨¨™?¦?™¨¨¨ بـــاريـــس ¨¨¨™?¦?™¨¨¨°

باريس عاصمة النور والجمال وهي احدى المدن الفرنسية الجميلة

وراح ابدأ بالمناطق في باريس حيث ان باريس تنقسم الى عشرين منطقه

وتسميتها تبدا من باريس واحد الى باريس عشرين طبعاً احلى المناطق

وأشهرها هي باريس ثمانيه بسبب وجود شارع المشاهير الشانزليزيه

يبدأ الشانزليزيه من المسلّة المصرية في منتصف ساحة الكونكورد وينتهي بقوس النصر

وانت ماشي على الشانزليزيه راح تشوف جميع جنسيات العالم والحركة

فيه تبدا من الصباح بافتتاح اليابانيين وتنتهي في حدود الساعة خمس

وطبعاً آخر من يمشي فيه ربعنا الخليجيين

ARC DE TRIOMPH وارتفاعه يصل الى 110 متر اذا طلعته

يعطيك بانورما على الشانزليزيه ولا اروع منه

المحلات في هالشارع كثيره ومن أشهرها محل العطورات وادوات الزينة سيفورا

وهالمحل يعتبر أكبر محلات العطورات في باريس


SEPHORA
^^^
ومن المحلات الكبيرة في هالشارع محل اسمه فناك

FNAC والمحل هذا جنب السيفورا وهو في قلب الشانزليزيه والمحل هذا

مشهور بالادوات الالكترونيه من كمبيوترات وجوالات وافلام فيديوواغاني الخ

والمحل هذا يبيع شرائح جوال مدفوعه (هلا الفرنسيين) سعر الشريحه

حوالي 30 يورو ويطلبون منك احضار جواز سفرك عشان يعطونك

شريحه!

وفيه محل ديزني لملابس والعاب الاطفال ولويس فويتون LOUIS

VUITTON وهذا من اغلى محلات الجلديات وتلقى اليابانيين صافين

فيه طوابير علشان يشترون منه

وشارل جوردان للاحذيه والجاكيتات ومحل قاب للملابس والمحلات

كثيره لو اعددها كلها ماخلصت

بعض شركات السيارات الكبيره لها صالات عرض خياليه في الشانزليزيه ومنها معرض للمرسيدس موجود

فيها موديلات خياليه ومعرض لتويوتا ومعرض رينو سيارات غريبه من جد

وفيه صالتين سينما لعرض اخر الافلام الامريكيه .. بس انتبه للفلم ترا فيه

عرض باللغة الفرنسيه وفيه عرض باللغة الانجليزيه وتقدر تسأل اللي يبيع

عند الشباك ايش اللغة في الفلم اللي راح تحضره او تشوفها على اللوحة

الأماميه لأوقات الأفلام

سوبرماركت كبيراسمه مونوبغي

Monoprix شعارهم كل شي في الثلاجة!

اشهر مقهى هو الفوكيت

Fouquets مافيه احد راح فرنسا ولاجلس فيه مسمى نسبة الى مؤسسه لويس فوكيه

خيالي ومكانه في الزاويه بين الشانزليزيه وشارع جورج الخامس

قبل ماتجلس في الفوكيت نصيحتي لك ادخل كشك الجرايد اللي قدامه

واشترى الجرايد العربيه مثل الشرق الاوسط او الحياة وسو نفسك مثقف

قدام اللي رايح واللي جاي قدام الفوكيت فيه كرسي عام دايم يجلس عليه هوم لس انيق يلبس دايم جاكيت

فرو ومثقف في نفس الوقت تلقاه يقرا جرايد

بس نصيحة للبنات اذا مروا من عنده يحاولون يسرعون لانه مهبول اي بنت تمر قدامه يفاجأها بكاميرته ويصورها

بس تراه حبيب ولاتستغرب اذا جاك وانت جالس وفتح باكت الدخان

والفوكيت يقفل الساعة 2 في الليل وهو من المقاهي الغالية سعر الكابتشينو فيه يوصل الى 8 او 9

يورو والماي 10 يورو!! ( الله لايغير علينا معاصرنا وقهاوينا )

ومن المقاهي المعروفه هناك قهوة باريس Cafe De Paris وهالقهوة اكثر اللي يجونها اجانب وهي جنب

الفوكيت ويجي بعدها قهوة لو دوفيل Le Deville هالقهوة ماتسكر الا الساعة 2 في الليل تلقى غالبية اللي

جالسين فيها حاجزين طاولاتهم من بدري (الخليجيين بس!! ) مع العلم ان فيه قهاوي افضل منها بكثير بس هالعالم

تعودوا من بعد الساعة 10 في الليل يجي مهرج جزائري بشنطته ويجلس يستهبل على اللي رايح واللي جاي

(والله ياهو ابلش اليابانيين ) ولكنه مايتعرض للسعوديين (بلاه التصطير اللي جاه من ثلاث سنوات ) وبعد مايخلص

استهباله يلم اللي قاسمة الله من اللي جالسين

هاجن داز Häagen-Dazs سلملي على هالمكان معروف عند كثير من الناس ببيع الايس كريم والجلسة في

هالمكان تحلو في اخر العصر لدرجة انك بتلقى عليه ناس طوابير يبون يجلسون فيه وفي هالفترة يجي نفس

المهرج الجزائري المذكور اعلاه

وفي الجهة المقابله من الهاجن داز تجي قهوة الماريوت Marriottوهالقهوة في نظري انا من احلى القهاوي

والسبب ان اللي يخدمون فيها نفسياتهم حلوه غير اللي في القهاوي الثانية ..وهي تقفل الساعة 12 في الليل ...

وتجي بعدها بمسافه قهوة اسمها مدريجال Le Madrigal هذا احلى وقت لها اول العصر الجزائري المذكور اعلاه

يجي فيها هالحزه ( وهنيه انجلد )

طبعاً المقاهي كثيره بس اللي ذكرته هنا اشهرها

مطاعم الوجبات السريعه المشهوره في الشارع هم ماكدونالدز McDonald's ومطعم كويك Quek هذولا اللي اتذكرهم

الباقي ناسيه اسماءها او بالاصح مافيه امل اتذكرها

نجي للفنادق طبعاً مافيه احد مايعرف فندق الماريوت Marriottوهالفندق مكانه في قلب الشارع ولاعليه كلام جنبه شقق

فندقيه اسمها كلاريدج Claridge حلوه بس مشكلتها انها شوي قديمه لو سكنت فيها وصادف ان الجو حار تقدر تطلب

مكيف للغرفه لانها تجي بدون مكيفات ولهواة الطبخ اطلبوا مواعين ولاتستحون .. خلوهم يجيبون اللي تبونه من

وعندهم زمزميات للقهوة والشاي وهالثنين هم الوحيدين اللي في الشانزليزيه لكن فيه حولهم فنادق كثيره منها

كاليفورنيا كلاريدج بولمان ، تشاتو فرونتناك ورويك وكونكورد لافاييت وهالاخير هو ابعدهم بينه وبين الشانز من

10 دقايق الى ربع ساعه مشي وغيرها وايد

قبل انهي كلامي عن هالشارع الكبير ابغى اذكركم بنقطه انتبهوا من النصابين اللي يجون يقولون احنا جوعانين

واحنا جايين من (.....) وما معنا فلوس واحنا واحنا ترى هالاشكال ماوراها الا المشاكل يعني لاتعطونهم وجه ابد

وبتلقون الطرارين البوسنيين والله ياهم علل!! ويجونك بالاسلام ان حنا مسلمين ومدري ايش وهم الله اعلم حريمهم تلقاهم

يدخنون في داعوس <<<<< كافشتهم

فيه بزر عله والله لو تعطيه مال قارون لازم يسوي حركات نص كم عليك اذا ابعد عنك وتلقاه من بكره جاي يطر منك

ولا كأن شي صار

خلصنا من الشانزليزيه ومافيه من محلات ومقاهي ومطاعم ونجي للشوارع الثانية المشهوره في باريس

شارع جورج الخامس او افنيو جورج اسانك Av. George V

وياتي في قلب هذا الشارع الفندق العالمي الشهير فندق جورج الخامس Four Seasons Hotel George V واللي تعود

ملكيته للامير الوليد بن طلال وهو من اغلى الفنادق في باريس وافخمها وجنبه فندق برنس دو قول Prince De Galles

ويوجد في راس الشارع شقق الكاريدور وهي قريبه وايد من الفوكيت وقدامها محل يبيع ايس كريم خطييييييييييييير

الظاهر ان اسمه بارادايس Paradise اذا ماني غلطانه لايفوتكم الايس كريم

وفي الشارع نفسه مطعم عربي وبقاله عربيه اسمهم الديوان اذا حنيتوا للاكل العربي تجون تاكلون فيه والمطعم مكانه

في الدور الثاني بس احيانا يبيلك تحجز قبل ماتجي وترا مافيه خربطه يعني مناسب للعوائل بس مشكلتهم اذا شافوك

خليجي صكوك بفاتورة مهيب صاحيه يدخلون فيها طلبات ماطلبتهاعشان كذا يبيلك تدقق في الفاتورة قبل ما تحاسبهم

هذا في الدور الارضي من المطعم فيه اكلات عربيه على السريع .. مثل شاورما وفلافل وكبه وانت ماشي وفيه بقاله

عربيه

ومن المطاعم العربيه الثانيه مطعم نورا ومكانه خلف فندق جورج الخامس وله فروع ثانيه في باريس وفي شارع

جورج الخامس مطعم حلو وفخم اسمه فندي FINDI وعلى ما اعتقد انه مايفتح الا في المساء وفي الشارع محل كبير

لجورجيو ارماني وبوتيك فريه FERRE وفيه محلين حلاقه في نفس الشارع ( رجالي ونسائي ) ممتازين بس الله ياخذهم

غاليين 00

وفيه شارع اسمه رو فوبور سان اونوريه Rue Faubourg St Honoré فيه فندق بريستول Bristol وهذا اغلى فندق في

باريس يعني اذا مريت من عنده شوفه وصد كأنك ماشفت شي

الـــــمـــــعــــالـــــ م

برج ايفل Eiffel Tower أعلى مكان في باريس ارتفاعه 276 متر وتطلع له بالمصعد والا بالدرج (ايه هين ) ويفتح من

الساعة 9 الى الساعه 12 في الليل بس نصيحتي لاتنسى تجيب جاكيت والا بتنتفض من البرد

متحف اللوفر

من اشهر المتاحف في العالم وموقعه خلف ساحة الكونكورد اللي في نهاية الشانزليزيه وفيه أشهر لوحه اللي هي

الموناليزا

قوس الدفاع او لا ديفانص Grande Arche de la Défense

القوس هذا مكانه في مقابل قوس النصر بس في مكان بعيد

مونباغناس montparnasse

وهذي اطول بنايه في اوروبا ارتفاعها يصل الى 209 متر وفيها مطعم يطل على باريس كلها

نهر السين

طوله 13 كيلو فيه رحلات سياحيه في النهر على سفن اسمها باتيموش تاخذ فيك لفه على النهر وفيه سفن فيها مطاعم

تقدر تتعشى فيها

الملاهي

ديزني لاند باريس Disny Land Paris

وهي تبعد 25 كيلومتر عن وسط باريس وتقدر تروح لها بالسيارة او بالقطار او بالباص منطقة الديزني عبارة عن منتجع

كامل يعني تلقى فيها فنادق وحدائق وملاهي ومطاعم مثل بلانيت هوليوود وبالنسبة للملاهي اول ماتدخلها تلقى

مكاين تبيع كروت اسمها فاست باس Fast Pass هذي ميزتها انك ماتصير تمسك طابور في الالعاب يعني اللي مافيه

صبر يشتريها

ملاهي استريكس Parc Asterix

ملاهي جميله وتبعد عن وسط باريس 36 كيلومتر

اكوا بولفار Aqua Boulevard

مدينة مائيه روعه للكبار والصغار

الحدائق

اشهر الحدائق الموجوده

جاردان دو شام دو مار Jardin du Champ de Mars

غابة بولونيا Bois de Boulogne

الغابة هذي في وسطها حدائق وبحيرات ويازينها

جاردان دو تيليريه Jardin Des Tuileries

حديقه حلوه وفيها مدينة ملاهي حلوه

الاسواق

اشهر سوق موجود في باريس هو القاليري لافاييت GALERIES LAFAYETTE

وهو في منطقة الاوبرا او باريس 9 على شارع بولفار اوسمان boulevard Haussmann ويتكون من سبعة او ثمانية

ادوار..ويفتح من الساعة 9 ونص صباحاً الى 7 ونص مساءً السوق هذا فيه اي شي تبيه

بعض الكلمات الفرنسية المتداولة : (طبعاً بدل الراء بالغين والفاء بـV )

صباح الخير : بونجور ، مساء الخير : بونسوار ، كيف حالك : كومون سافا ، بخير : تخغيبيان ، الى اللقاء : اوروفوار ،

تصبح على خير : بون وي ، انا اسمي فيصل : جو مابيل فيصل ، تتكلم فرنسي : باغليفو فغانسي ، من فضلك : سيل

فو بليه ، شكراً جزيلاً : ميغسي بوكو ، حسناً : داكور ، نعم : وي ، لا : نو ، اعذرني : اكسيكيوزموا ، آسف : باردون ،

كيفكم : كومون اليفو ، 1 : اون ، 2 : دو ، 3 : تروا ، 4 : كاتر ، 5 : سانك ، 6 : سيس ، 7 : سيت ، 8 : ويت ، 9 : نوف

(يازين هالرقم ) ، 10 : ديس ، مبسوط بشوفتكم : انشانتيه دوفوفوار ، انا : موا ، انت : توا ، هو : ايل ،

الايام من السبت الى الى الجمعة : سامودي ، ديمانش ، ليندي ، ماردي ، ميركودي ، جودي ، فانترودي .

التنقل في باريس اما عن طريق المترو او التاكسي ، المترو اول شي تشوف خط سيرك والمحطة اللي تبي تروحلها

وبعدين تقص تذكره سعرها تقريباً 1ونص يورو وتوصلك للمكان اللي تبيه وانتبه تقط التذكرة اذا دخلت .. لان الشرطة

احيانا تسوي حملات تفتيش على التذاكر واذا مالقوا التذكرة دخلت في سين وجيم وانتبه من النشالين ترى اساليبهم

كثيره والتاكسي من 7 الصباح الى 7 المساء تختلف تسعيرته عن بعد الساعة 7 في المساء طبعاً في المساء تكون

اغلى !!وممنوع انك توقفه من اي مكان .. لازم تاخذه من عند موقف التكاسي وتلقى لوحه مكتوب عليها TAXI اوقف

تحتها وبيجيك التاكسي

وبالنسبة للمساجد اللي يصلى فيها الجمعة تقدر تتصل على الرقم هذا وهم

بيعلمونك عن اقرب مسجد لك

Phone for the public

33 97 35 45 (1) 33+

أتمنى لكم سفره سعيده

العفو لولو مشكور لمرورك العطر






العفو ياسمسمـ

بس كدة

ليك عليا ياسيدي اول ماتعمل 10000 مشاركة فى المنتدي

هخلي احمد يحجزلك تذكرة بااقامة 4 ايام كمان

مشكور لمرورك ياصاحبي هههههههههه

اها بس كدة عيوني يابيـبي

وتسلمي لمرورك الجميل

قسما لن ننساك